رواية خطوبة الندامة كاملة جميع الفصول بقلم ايمان شلبي

ده بيدفعك حق الاوبر اللي بتركبيه،ده بيخليكي تدفعي في الكافيه حق المشروب اللي بيطفحه

ده بخيل ومعفن،يابت ده لما بيجي يزورنا مبيدخلش بكيس فاكهه في أيده بلا خيبه وتقوليلي كويس

انا مبرضاش اتكلم معاكي عشان متزعليش بس لحد هنا وكفايه بقي

الدموع لمعت في عيني وانا برد بعصبيه:

-خلاص ياماما كفايه بقي انا وخالد بنحب بعض والمواضيع ديه مش بتفرق معايا

ضحكت بسخرية وهي بتقوم:

-اه بيحبك لا واضح فعلا الحب كتك نيله علي خيبتك هتفضلي طول عمرك فقريه،اتقدملك احسن منه مليون مره بس انتي اللي وش فقر

قالت كلامها بعصبيه وخرجت من الاوضه وانا ببص لآثرها  بحزن ودموعي علي خدي

اتنهدت بضيق:

-استغفر الله العظيم واتوب إليه

شويه والفون بتاعي رن

اول ما شوفت رقمه رديت بلهفه

-خالد

-امك كلمت امي ليه

رديت بذهول:

-يعني ايه ليه،خالد انت مش ملاحظ انك مش بتكلمني بقالك اسبوع !

-ايوه وده ايه علاقته

-هو ايه اللي ايه علاقته

-انتي عايزه ايه يابنت الناس

رديت بعصبيه:

-هو في ايه ياخالد أنا عملت ايه لكل ده ؟؟