رواية خطوبة الندامة كاملة جميع الفصول بقلم ايمان شلبي
بقي شخص مختلف تمامًا عن الشخص اللي عرفته زمان !
قبل الخطوبه مكانش بيخليني ادفع جنيه من معايا
كان اه بيزعل مني كتير بس عمره ما سابني يوم نايمه زعلانه
في حاجات كتير جدا اتغيرت في تصرفاته لكن للاسف انا بحبه
مهما حصل ومهما اتغير قلبي بيحبه وبيعدي وبيتغاضي عن حاجات كتير عمره ما تغاضي عنها مع حد غيره
خلصت لبس وخرجت لقيت ماما وبابا قاعدين في الصالون بيتكلموا بصوت واطي
-بابا انا هنزل بعد اذنك
-رايحه فين ياتاليا
فركت ايدي بتوتر وانا ببصلهم:
-هقابل خالد
ماما بسخريه:
-اخيرًا البيه حن ورد عليكي
رديت بضيق:
-ماما لو سمحتي خلاص بقي
-خلصت روحك وروحه ياللي مفيش عندك كرامه و...
بابا وهو بيبصلها بتحذير وبيقاطعها:
-مرووه
-يلا مروه بلا زفت،يخربيت دي جوازه علي اللي عايزنها
-انا نازله يابابا عن اذنك
روحت نحيه الباب وقبل ما اخرج قالتلي بسخريه:
-متنسيش تبقي تدفعي حق الاوبر والكافيه ياهبله يابنت الهبله
اخدت نفس طويل وانا بحاول معيطش ونزلت طلبت اوبر وشويه ووصلت قدام الكافيه
-الو انت فين ؟
-انا قاعد جوا في الكافيه وانتي
-طيب انا داخله
قفلت الفون ودخلت لقيته قاعد وقدامه فنجان قهوه وطبق مولتن
قربت منه وهو بيبصلي بنظرات غريبه ومريبه
قعدت وانا ببصله بعتاب:
-اهون عليك متكلمنيش كل ده ؟؟
بلع المولتن اللي في بوقه ورد بضيق:
-خلاص بقي ياتاليا قولتلك حقك عليا
بصيتله بضيق:
-تمام بس لو سمحت الموضوع ده ميحصلش تاني
-ان شاء الله
سكت لحظه وانا ببصله وهو بياكل المولتن وبيلحس الشوكلت اللي كانت في الطبق بشكل مقزز في الحقيقه
