محضر من بيت الطاعه

 فضحك خالد وقله اختك دى تبقى مراتى ومعايا حكم محكمه أنها تيجى تعيش معايا هنا ولو مانفذتوش هتدخل السجن وساعتها السجن بقى هو إلى يذلها وراح ماسك ايد اخويا من عليه ومنزلها بغضب وقله اطلع بره وسبلى مراتى امشيها على مزاجى اعلمها الادب إلى ماقدرتش تعلمهولها انتو 

 اخويا اتهور فى اللحظه دى. ومسك خالد ضربه جامد قوى بس الغريبه أن خالد ماكنش بيقاوم اخويا وكان مستسلم لضربه وكأنه كان عايز اخويا يضربه بكل قوه لحاجه عرفتها بعدين خالد اول ما شاف دمه على الارض صرخ ولم الناس علينا وطلب منهم يمسكو اخويا ومايسبوه وبعدها هو طلع يجرى وقدم بلاغ وهو بيطلب إثبات حاله وتحويله إلى المستشفى إلى كتبتله على علاج اكتر من واحد وعشرين يوم وبالتالى تم القبض على اخويا وتحويله إلى الجنايات وهناك خالد اتهمه بأنه كان عايز يقتله وبسرعه بقيت قضيه ومحدش فاهم حاجه فى اى حاجه وانا واقفه اتفرج بس ومش عارفه اعمل حاجه ولاول مره احس انى وحيده محدش جنبى انا الى الكل كان ديما معايا ويتمنولى الرضا ارضى اجه اليوم إلى شفت نفسى وحيده ومحدش جنبى ولا معايا 

ابويا نايم فى البيت مش قادر يتكلم مع حد ومحدش راضى يجبله اى سيره عن قضية اخويا 

امى غضبانه عليه وبتقلى خربتى البيت بدلعك المايع ده 

اخواتى الاولاد مقطعنى ومحدش فيهم راضى يكلمنى 

اخويا مرمى فى السجن ومستقبله بيضيع والمحامى بيقول موقفه صعب لازم خالد يتصالح معاه ويتنازل عن القضيه والا هيتحبس 

خالد بيقلى هجيبك راكعه تحت رجليه والادب الى مااتعلمتهوش من ابوكى وامك انا هعلمهولك

 وظلمك للناس واتهامك ليهم بالباطل هدوقهولك

 وخراب البيوت هدفعك تمنه غالى قوى عشان انتى تستاهلى كده 

كل ده بيحصل حواليه وانا مش فاهمه هو ليه كل ده بيحصل معايا عملت اى انا عشان يتعمل فيه كل ده 

ولقيت نفسي مره تانى بروح لخالد واترجاه أنه يرحم اخويا ويتصالح معاه مستقبله بيضيع وأنه يقول الحقيقه كلها لابويا وامى الى مقاطعنى واخواتى كمان الى مكسوفين منى قدام الناس وانى مستعده اعمل اى حاجه ترضيه 

فلقيته بيقلى إلى يرضينى انك تيجى تعيشى معايا هنا تخدمينى وتخدمى امى وابويا والى اقلك عليه تنفذيه من غير اى كلام