محضر من بيت الطاعه

كنت شايله البنت وانا مش عارفه اعمل معاها اى هى ولا اخواتها

 انا رغم انى انسه كبيره الى فى سنى اتجوزو ومعاهم بدل العيل اتنين وتلاته لكن عمرى مااتحطيت فى الموقف ده انا كنت بنت على تلات اولاد يعنى الدلع كله مااعرفش حتى ادخل المطبخ كل حاجتى كنت اصح من نومى الاقيها جاهزه من اول هدومى لحد اكلى وشربى وطلباتى وكانى عيله مش عارفه اعتمد على نفسى فى اى حاجه كنت بدلع على الكل والكل كان راضى بدلعى لكن دلوقتى مفيش دلع فى عقاب وكان الايام الى عشتها مرتاحه هتخلص منى اليومين الجايين مع خالد وولاده 

إلى فعلا أصبحت ليهم ام بديله اغيرلهم هدومهم واكلهم واشربهم وانيمهم  لكن البنت الصغيره ماكنتش عارفه اعمل معاها حاجه كانت صغيره قوى وكنت بحسها ديما محتاجه لحضن امها إلى حاولت على قد مااقدر اعوضها عن غيابها وكنت ديما بطلب المساعده من خالد الى كل مايسمعنى اقول كده يقلى خليكى حنينه عليها حسسيها بحنانك وهى تحبك وتنام معاكى وتسمع كلامك البنت محتاج حنان امها إلى اتحرمت منها والبركه فيكى

 وكل ما اقله ليه هو أنا عملت فى امها حاجه هو انا اعرفها اصلا

 يقلى عملك اسود ومنيل ماكنتيش تعرفيها واذتيها اومال لو كنتى تعرفيها شخصيا كنتى عملتى فيها اى 

وكل شويه كان بيهددنى ويخوفنى ويقلى هدفعك التمن غالى عشان تحرمى تعملى اى حاجه زى كده تانى مع اى حد سواء تعرفيه أو ماتعرفهوش 

كان كلامه ديما ليه لؤم واتهام انى انا السبب بس فى اى مقدرتش اعرف بيتهمنى ديما إن دمرت حياة ناس بدلعى واستهتراى بس مين الناس دول ولا انا عملت اى دماغى كانت واقفه عن التفكير كنت ناسيه حتى امبارح أكلة اى كل إلى حصلى من يوم ماشفت خالد وقلى انى اجوزتك خلى دماغى مشلوله فى تفكيرى حتى مش قادره افتكر امتى مضيت أو بصمت على ورقة الجواز إلى بيقول عليها 

قعدت ايام كتيره  احاول افتكر عملت اى بالضبط ماعرفتش فوجودى فى بيت خالد ومع ولاده وجوازى منه إلى مااعرفش حصل ازاى خلانى كنت قربت اتجنن وانا بحاول افتكر اى حاجه توصلنى لكن فشلت 

وعشت فى بيت خالد ومع ولاده حوالى اسبوع وكل مااقله روح أتنازل عن المحضر الى مقدمه فى اخويا 

يقلى بكره بكره 

اقله اناعملت الى قلتلى عليه وعشت معاك خدامه انت وولادك عايز اى منى تانى

 يقلى عايز ازلك وادوقك الظلم عشان تحرمى تظلمى حد