قصة شرايط العهد
اقولك،، قول للنيابة إني مجنون لكن قولهم إنه عمال يحكي عن حلم بيحلمه بأوضة فوق السطوح البنت كانت فيها محبوسة وليها آثار خرابيش على جدرانها والأوضه دي هي اللي اتقتلت فيها تحت علم أمها وساعتها انا نفسي هحل حكايتي دي وهريحك مني
والنيابة صدقني مش هتخسر حاجه لو دورت في الناحية دي ولو لمجرد تحقيق واحد
ساعتها قام وانا حاسس في عينيه بتردد
فقلتله
_ارجوك، مجرد محاولة واحده
فوقف في مكانه
=اوعدك هحاول،، لكن لازم تعرف إني همد مدة الملاحظة عشر ايام هتفضل فيهم معانا.
مكالمة هاتفية مابين الدكتور نبيل المسئول عن حالة ابراهيم وأحمد بيه سالم رئيس نيابة التحقيق
_مساء الخير أحمد بيه، ازي صحة معاليك يا فندم؟
=ازيك يا دكتور اخبارك ايه؟ خير في حاجه بخصوص الحالة اللي حولناها، انا عرفت ان انت اللي مسكتها
_والله يا أحمد بيه هي حاجه أه بخصوص الحالة وبخصوص القضية ككل،، الفني اللي إسمه ابراهيم دا متمسك بكلامه بشكل غريب لدرجة شككتني إنه مايكونش مريض نفسي حقيقي
=تقصد ايه يا دكتور
_انت عارف يا احمد بيه ان طبعا لا انا بؤمن ولا في نطاق شغلنا في أي مجال لأشباح ومس ولبس وكلام فاضي من دا لكن ممكن نسميها رؤية أو تخاطر او توارد افكار
=بخصوص ايه؟
_ابراهيم دا متمسك جدا بحاجه واحدة، ان التيلة دي اتتلت في....
=امممم،، يعني مثلا ممكن اعتبر دي شهادة شاهد طبيعية
_انا مابفهمش في القانون يا فندم لكن هو مستعد يشهد لو اتطلب منه ده
=لكن هو بردو ماينفعش يشهد لإنه مش محيط نهائيا ببؤرة الاحداث هو مجرد فني وصلته الجثه
_طب ماينفعش نعتبره بلاغ من مجهول مثلا
=ممكن حد مجهول يعمل اخباريه للمباحث بخصوص قضايا جاري التحقيق فيها عادي وساعتها لسلطات الضبط القضائي سلطة تقديرية في مدى جدية البلاغ ومدى امكانية بحثه
_يعني لو البلاغ دا اتعمل ممكن يتبحث على وجه الجدية
=ماتقلقش،،مع يقينك دا اكيد هيتبحث
_شاكر جدا لمعاليك يا فندم
خلال يومين رشاد عمل بلاغ من مجهول بكل اللي مليتهوله وتحقيقات النيابة بعدها ومن خلال المعمل الجنائي أثبتت وجود آثار خرابيش على حيطة وباب وشبابيك الأوضة اللي فوق السطوح وبالمعاينة أثبتوا إنها تخص القتيلة
مع عدم وجود أي علامات لكسر في الأوضة ممكن تهرب منه البنت ومع مواجهة الأم حاولت تنكر في البداية لكن مع المستجدات كان الخناق بيضيق عليها
خاصة لما كثفوا استجواب شهود من المنطقة افادوا كلهم ان ماحدش شاف البنت بقالهم فترة من آخر مره حاولت تهرب فيها
لا شافوها في الشارع طبيعي ولا وهي بتهرب وفي الأخير مرات الأب لما واجهوها بالتفاصيل اللي قالها رشاد في بلاغه بعد ما اتأكدوا من حقيقة الجزء الخاص بالحبس
اعترفت بالجريمة وأدلت ببيانات الشريك اللي اتقبض عليه
وفي آخر ليلة من ليالي الملاحظة ظهرتلي تاني
كنت عرفت اسمها
كان اسمها نور
كانت مبتسمة ومبسوطة
فقلت لها
_مشكلتك اتحلت،، وروحك هترتاح،، لكن انا هفضل في العذاب ده
=ومين اللي قال كدة
_انتي مش قلتي إنك لو كنتي تعرفي حل كنتي نفعتي نفسك
=أه دا لما كنت في العالم بتاعك لما كنت روح في جسد
_يعني ايه؟
=يعني انا اللي حركت الشرايط من الكيس اللي كنت انت حافظها فيه،، ساعة لما قلتلي مش عايز الاعيبكم دي،، ولما قربت عليها ولمستها انا اللي لفيتها حوالين جسمك كمان،، لان عمرها ما كانت هتصيبك غير لما تتلف حواليك
وقتها برقت عينيا
