قصة شرايط العهد

وساعتها بس رجعت الشرايط اللي كنت بحذرك منها تظهر فوق جسمي وهدومي

اللي ماكانش لازم تلمسها بإيدك وقت حلول خادم تعاويذها فيها

وقت ما كانت بتتحرك

المهم انه غاب ثواني بره الأوضه

بعدها بشويه لقيت مرات ابويا دخلت الأوضة ومعاها الشيخ

كانت بتلطم لما شافتني ميته فقالها إنه حاول يفك سحري لكن شرايط العهد هي اللي قتلتني ولما سألته هنعمل ايه ؟؟

قالها تجيبله شكارة خيش كبيرة عشان يحط جثتي فيها من غير ما يلمسوا الشرايط وبعدها يخد الشكارة يرميها في ترعة بعيدة عن دارنا وبلدنا بعد ما يحط تقل فيها عشان جثتي ماتقبش تاني فوق المية وتاني يوم هيرمي في نفس المكان كلب ميت عشان لو الريحة ظهرت الناس تقول انها ريحة الكلب المنفوخ اللي عايم على وش المية،، وهي تروح تبلغ بغيابي وهروبي من البيت عشان لو اكتشفوا جثتي بعد كدة تكون بعيد عن الحكاية

لكن صيادين من قرية جنب بلدكم لقيوني وجيت عندكم المشرحة...

وقتها خلصت حكايتها وكل اللي كان شاغل بالي حاجه واحده وهي الحل ايه في شرايط العهد وفين دلوقتي حاملها اللي كان بيكلمني

فسألتها

_هو ليه اختفى؟؟

فالتفتت حواليها وبعدين قالت

=هو على طول معاك لكن مافيش مخلوق مابيغفلش أو ينام لكن صدقني في الأول بس هتحس في أوقات غيابه انك حر انما بعد كدة

حتى وهو غايب هتلاقي الوساوس محاوطاك وبتتلفت حواليك وبتشوف خيالات وبتسمع أصوات زي ما يكون عقلك اتبرمج على الوضع ده

_طب والحل ايه؟

فبصت بأسف

=كنت نفعت نفسي لو عرفت

_وانتي هتظهري تاني

=مع الوقت حتى لو حاولت اظهر في اوقات غفلته انت مش هتسمعني ولا تشوفني انت هتكون تايه في دوامة من السواد

فبصيت في الأرض لثواني وانا ماعدتش لاقي أسأله عشان أسألها لكن مجرد ما رفعت راسي مالقيتهاش

كانت اختفت فجأه زي ما ظهرت فجأه من غير ما اخد بالي إني ماسألتش حتى عن إسمها ولا وعدتها إني أساعدها لكن دا كان طبعي إني مهما سمعت منهم بسمع وبس لكن عمري ما حاولت انقل اللي سمعته حتى من اللي طلبوا مساعدتي

بعدها بدقايق سمعت باب شقتي بيخبط

فقومت عشان افتح الباب لقيت الصوت ظهر تاني ورا ضهري وبيقول

...ماتفتحش الباب دول جايين يخدوك،، رشاد بلغ عنك وهتتحبس بتهمة التمثيل بججث0ة

....رشاد عايز يخلص منك بعد اللي بقا بيشوفه منك واللي هو السبب فيه

فالتفت ورايا ماشوفتش حاجه والباب بعدها خبط تاني لكن كنت خايف افتح لغاية ما سمعت صوت امي من ورا الباب بتنده

فجريت على الباب فتحته

لما الصوت رجع تاني من ورا ضهري

_يبقى جم سألوا عليك وامك قالتلهم انك مش هنا..

فسألت أمي وهي لسه واقفه عالباب بلهفة

_حد سأل عليا ؟؟

فزقتني ودخلت قعدت على الكنبة اللي في الصالة وبعدها ردت

=أيوه

_مين، الحكومة؟؟

=حكومة ايه يابني لا سامح الله

_امال مين

=دا رشاد اتصل على تليفوني وبيقول انك نسيت تليفونك في المستشفى وعايزينك هناك

ساعتها ظهر الصوت تاني

...يبقى هيسلموك من هناك،، قلتلك قبل كدة اقتله وارتاح من غدره

=مالك يا ابراهيم بتتلفت وراك ليه؟

_مافيش حاجه يا امه

=طب روح يابني شوف هم عايزينك ليه

...بقلك اوعى تروح

=مالك يابني

_خلاص يا امه هروح اهوه

...هيسلموك يا ابراهيم

وقتها نزلت بسرعة ع السلم وركبت توكتوك