سمعت صوت
انت في الصفحة 1 من 5 صفحات
سمعت صوت صړېخ جامد عند جارتي مع صوت المطر والرعد الرهيب ..
فتحت باب الشقة وفضلت أخبط عليها لحد ما فتحتلي وهي مخضوضه جدا
قالتلي الحقيني إبني تعبان وأغمى عليه ودرجة حرارته عاليه جدا قولتلها ما تقلقيش هنوديه المستشفى قالتلي مش هينفع باباها راجل كبير وقعيد على كرسي عنده شلل نصفي ولازم يكون في حد معاه
قولتلها خلاص روحي وانا هقعد معاه لحد ما ترجعي شكرتني بسرعه ولبست هدومها وخدت إبنها ونزلت عالمستشفى .. أنا منة الله ..28 سنة متزوجة بقى لي 3 سنين بس ربنا ما رزقنيش بعيال .. روحت لدكاترة كتير بس برده ربنا لسه ما أردش
أنا عايشة مع جوزي عمر في شقة في منطقة راقية .. وجارتنا هدير موجودة من قبل ما نيجي بكتير وجوزها متوفي وعايشه هي وابنها وباباها .. عمر جوزي دلوقتي في الشغل وانا ما ينفعش أسيب هدير في مشكلة وما أقفش جمبها لان اكيد هيجي يوم وتقف هي كمان جنبي
فضلت قاعدة في الصالة عندها ومستنيه باباها يصحى عشان أحطله الاكل زي ما قالتلي واديله الدواء اللي حطيتهولي على السفرة .. بعدها قولت أجيب موبايلي من الشقه عندي عشان اكلم عمر أعرفه طلعت لقيتني سيت المفتاح في البيت والموبايل جوه .. كده هرجع تاني شقة هدير واخلي ودني مع السلم لما اسمع صوت مفاتيح عمر هفتح واقوله
فضلت قاعدة أتفرج على بيتها انا ماكنتش بزورها كتير ولا هي كل واحد كان في حياته الخاصة بس بيتها جميل جدا وفي أنتيكات غاليه كتير .. قومت بصيت على كوميدينو كبير خشب مليان أدراج وفوقيه في بندقية متعلقه وصورها هي وابنها وباباها .. بعدها لمحت درج مفتوح فتحته وفضلت أقلب فيه انا عارفه اللي انا بعمله ده غلط
بس انا بحب أعرف شايله ايه ومش هسرق حاجه .. وانا بفتح في الادراج لقيت في حاجه غريبة لقيت عضم فراخ كتير
مع انهم مش مربيين اي حيوانات فتحت الدرج بالراحه لقيت ورق كتير .. متشخبط عليه حروف منظر الورقه يخلي اي حد يقلق بسبب لونها الاصفر وشكلها المريب .. قلبت الورقه لقيت صورة باباها وهوا واقف ومحطوط دبابيس صغيره على رجليه ..لمست الدبوس فجأة سمعت صوت حد بينده هدير يا هدير
