صراحة حمايا معايا

انا حمايا قالي أغرب جملة ممكن عريس يسمعها وهو رايح يتقدم لواحدة ( لو بتخاف خد الجاتوه دا وروح ) وقتها طبعا انا خدت الجملة دي على محمل الدعابة العائلية اللي بتتقال في المناسبات اللي شبه دي، بس بعد الجواز فهمت اني كنت متسرع وغبي لما ما اديتش تحذير مهم زي دا الإهتمام اللي يستاهله..

صباح الخير، معاكم جوز رئيسة أكبر جمعية سرية في الشرق الأوسط لاستدعاء أرواح الموتى..

أول قاعدة من قواعد جمعية العائدون اللي مراتي رئيستها بتقول مفيش حاجة اسمها المoت.. انتهى..

المoت ما هو إلا توصيف قاصر لعملية انتقال معقدة من عالم الفناء لعالم الخلود..

كل الأرواح بتسبح في فضاء العالم التاني بعيد عن كل دواير إدراكنا، محدش يقدر يفتح معاهم قناة اتصال إلا الموهبين بملكة الشفافية ودي ملكة خاصة جدا ربنا بيمنحها لناس قليلين أوي مراتي كانت واحدة منهم..

مكنتش اتخيل ان في يوم من الأيام هيحصل اجتماع في بيتي بين قادة الدول المشاركة في الحرب العالمية التانية..

مكنتش اتخيل ان هتلر هيقعد مكاني على الكنبة اللي بقعد عليها واتفرج على التلفزيون..

او اني ممكن اسمع بودني صوت أبويا اللي م١ت وانا عمري اربع سنين، سمعته واتكلمت معاه وحكالي تفاصيل في حياتنا القديمة محدش يعرفها غير والدتي الله يرحمها، حكالي أن روحه مفارقتناش لحظة واحدة، كان معايه لما نجحت في الثانوية العامة، وكان معايه لما اتخرجت من كلية الإعلام، وكان معايه لما طلعت في التلفزيون لأول مرة في حياتي أقدم نشرة الأخبار، الأرواح موجودة حوالينا، بتشوفنا بس احنا مبنشوفهاش، مبنحسش بوجودها، بتأثر في حياتنا..

انا عرفت مين اللي ظبط المنبه على ميعاد خروجي من البيت يوم ما كنت رايح اعمل انترفيو مهم في أول قناة فضائية اشتغلت فيها، انا يومها راحت عليا نومة قبل ما اظبط المنبه على ميعاد صحياني، أنا متأكد اني نسيت اظبط المنبه، بس الغريبة أن المنبه رن في اليوم دا فعلا وصحاني، بقالي سنين فاكر القصة دي ومش قادر انساها وعمري ما لقيت تفسير للي حصل في اليوم دا لحد ما مراتي حضرت روح والدتي، وعرفت أن روحها هي اللي صحيتني من النوم علشان الحق اهم مشوار في حياتي..